д. Скородум

Ранитлісны Пӧкрӧв лунӧ

Вочасӧн мунӧны олӧмысь фронтӧвикъяс. Со и Кырныша грездын талун кежлӧ Великӧй Отечественнӧй войнаса сӧмын 2 участник ловъ-яыс коли. На пиысь ӧтиыс — Василий Афа­насьевич Дёмин. Ыджыд олӧм вуджис фрон­тӧвик. Чужліс Кырныша грездын 1921 воӧ. Быдмис-уджаліс, 16 арӧсӧн нин велӧдчис трактористӧ. Зонкаӧс пыр кыскис техника дорӧ. Но кад воис мунны служитны. И 1940 воын том зонмӧс босьтісны действующӧй армияӧ. Веськаліс Саратов дорӧ, мӧдӧд танкӧвӧй училищеӧ. Но висьмӧм вӧсна сетісны во кежлӧ отсрочка. Бӧр локтіс гортӧ да уджаліс МТС-ын. А сэсся пансис война…

Василий Афанасьевичӧс босьтісны фронт вылӧ 1942 вося февраль 1 лунӧ. Медводз нуисны Котласӧ. Зонлы вӧлі окота бӧр веськавны танкӧвӧй войскаӧ. Юасьӧ вӧлӧм комиссиялысь: «Танкӧвӧйӧ мӧдӧданныд?» Огӧ пӧ. Мӧдарӧ пӧ, кутан танкъяслы воча тышкасьны, артиллеристӧн лоан… Быдлаӧ сэсся веськавліс коми зон. И ездӧвӧйӧн вӧлі, и связист-катушечникӧн, и связист-телефонистӧн. И быд лун ёртъяс пиысь кодкӧ пӧгибнитӧ, либӧ ранитчӧ. Василийлы первой везитіс. Но воис и сылӧн кад…

— Октябрь 14 лун вӧлі, Пӧкрӧв лун, — водзӧ казьтывлӧ фронтӧвик. — Муні линия видзӧдлыны, кытікӧ орӧма да. Аддзи местасӧ. Йиті, водзӧ мӧдӧдчи. Паныдаси помкомвзвода Жуковкӧд, сійӧ горзӧ: бӧр пӧ мотайт проводъястӧ, немеч пӧ контрнаступлениеӧ петіс. Me бӧр мӧдӧдчи. Сӧмын воськов-мӧд вӧчи, немечлӧн снаряд улӧ веськалі. Кокчерйӧ осколок швачнитіс. Жуковлы горза, мися, ранитчи. Но сійӧ эз кыв и кытчӧкӧ вошис. Куті кыссьыны. Вои позицияӧдз, — сэн некод нин абу, сӧмын кык боец кольӧмаӧсь. Верман кӧ пӧ, пышйы татысь. А кыдз, мися, ме пышъя этатшӧм кокнас? Воӧдчи блиндажӧдз и бара снаряд улӧ веськалі. Но ӧтарӧ водзлань кысси. Кутшӧмкӧ нюрӧ пыри. Беддьысь кӧстыль сяма вӧчи, кӧть эськӧ мунны водзӧ эг нин прамӧя вермы, кок лапаяс пыкталісны, краж кодьӧсь. Век жӧ воӧдчи кутшӧмкӧ туйӧдз. Аддзис менӧ сэтысь санинструктор, пукталіс кокӧ шинаяс: водзӧ пӧ кыссьы, кытчӧдз верман. Казяліс сэки разведкаса командир, тӧдса капитан Щукин: ранитчин пӧ, Дёмин? Час пӧ ме тэд отсала. Снарядъяс пӧ вӧвъясӧн вайисны, и тэнӧ вӧвнас передӧвӧй вывсьыс мӧдӧдам. И нуисны. Передӧвӧй  санчастьын перйисны осколокъяс и мӧдӧдісны водзӧ. Асланым санчастьным вӧлӧма 10 километр сайын. Сэсянь нуисны Великие Луки кар дорӧ, сэсся — Пески станцияӧдз. 12 лун видзисны сэні. Кымынӧн кувсисны да номырзисны! Коркӧ сэсся вайисны миянӧс Калинин карӧдз, сюйисны вӧвлӧм складӧ. И сӧмын та бӧрын  веськалім лӧсяланаджык условиеясӧ, госпитальӧ, коді меститчӧма школаӧ. Вӧлі 1943 вося ноябрь 6 лун. Праздник матыстчӧ, да и миян Киев босьтісны. Госпитальын кызвыныс кокниа ранитчӧмаяс, и сӧмын ме ветлӧдлыны ог вермы. Матыстчис бурдӧдысь врач да юалӧ: кутшӧм пӧ тэнад национальностьыд? Мися, коми. Врачыс еврейка вӧлі и, надейнӧ, думыштӧма, мый ме сэтшӧм жӧ национальностя. Сетіс меным блюд тыр кампет. Со тадзи ме сэки праздничайті.

Коркӧ сэсся сӧлӧдісны поездӧ и нуисны миянӧс Верещагино карӧ (ӧнія Пермской обласьтын). Бара куйлі госпитальын, и 1944 вося май тӧлысьын менӧ комиссуйтісны, сетісны 2 группаа инвалидность. Тадз меным помасис война.

Век жӧ шудыс Василий Афанасьевичлӧн вӧлӧма на. Кӧть ранитчӧмӧн, но ловйӧн гортас локтіс. Вель дыр кӧстыльӧн ветліс. Сьӧкыд удж, дерт, первойтӧ вӧчны эз вермы. Тшӧктісны видзны вӧвъясӧс. И счетоводӧн уджалыштіс. Но эз кыскы коми мужикӧс сьӧлӧмыс татшӧм уджъяс вылас. Окота вӧлі техника дорӧ.  Збыльмис кӧсйӧмыс. В.А. Дёмин 1964 воӧдз вӧлі МТС-ын, а сэсся доручастокын трактористӧн. А сэсся — пенсия вылӧ. Сетісны военнӧй инвалидность. Гӧтырыскӧд, Евдокия Александровнакӧд, чужтісны 8 ныла-пиаӧс. Но олӧмыс артмис сідзи, мый быдтысьны ковмис ӧтнаслы батьыслы, Василий Афанасьевичлы. Разӧдчалісны челядь. Кык ныв олӧны Пузлаын, ӧти — Усинскын, ӧти — Помӧсдінын, пияныс – Сыктыв Выльгортын, Ярашъюын да Нижньӧй Тагилын. А внук-правнукъяссӧ лыддьӧдлыны чуньыд оз тырмы.

Эм мый казьтывны Василий Афанасьевичлы. Олӧмсӧ эз прӧстӧ ло олӧма. Аскиалуныс — челядьыс да внукъясыс. Сӧмын мед дзоньвидзалун ещӧ Енмыс сетыштіс.

А.Шебырев.

Снимок вылын: В.А. ДЁМИН.

 © Усть-Куломская межпоселенческая библиотека